Product Summery

Abdulla Qahhorning “Sarob” romanini oʻzbek va qardosh xalqlarning bir qancha adiblari oʻzlari uchun mahorat maktabi, deb bilganlar. Asardagi chuqur psixologik tahlil namunalaridan, xarakter va holat yaratish usullaridan, syujet va kompozitsion yaxlitlikka erishish yoʻllaridan, ayniqsa, badiiy tilning jozib tovlanishidan saboq olganlar va olmoqdalar. Roman yaratilgan paytidan buyon adabiyotshunoslikning diqqat markazidan tushmay, hali-hamon qizgʻin bahslarga sabab boʻlmoqda. Asarning gʻoyaviy-badiiy xususiyatlaryni jiddiy va batafsil tahlil qilgan adabiyotshunoslar O. Sharafiddinov, M. Qoʻshjonov, U. Normatov, V. Smirnova, M. Sultonova ishlari, nafaqat qahhorshunoslikning, balki oʻzbek romanshunosligining ham salmoqli yutuqlari boʻlib qoldi. Biroq “Sarob”ga oid maqolalarda romanning yozilish tarixi, muallifni bu ishga jazm etishida hal qiluvchi rol oʻynagan sabablar haqida bir-birini takrorlovchi taxminiy mulohazalardan nariga oʻtilmagan. Xususan, ushbu masala koʻtarilganida adabiyotshunoslarimiz A. Qahhorning “Bir xatga javob”idagi quyidagi qisqa izohni keltirishadi: “30-yillarning boshlarida taqdir meni burjoʻa millatchilariga roʻpara qildi, bular mening nafrat va gʻazabimni qoʻzgʻatdi, yaʼni muvozanatimni buzdi. Men oʻzimda uygʻongan bu tuygʻuni boshqalarda ham uygʻotishga yengib boʻlmas xohish sezdim. Buning natijasi boʻlib «Sarob” romani vujudga keldi».